Инвестиција во иднината: Дигитални вештини, образование и можности за младите
На 16 септември 2026 година, на покана на Љупка Панчевска, извршна директорка на Junior Achievement Macedonia, во хотел „Гарденија“ во Велес, Семос Едукација, во рамки на меморандумот за соработка со Junior Achievement Macedonia, учествуваше на настан посветен на наставници од основните и средните училишта ширум државата. Настанот претставуваше можност за размена на идеи, искуства и добри практики за подготовка на младите за предизвиците и можностите на современиот дигитален свет.
Пред присутните наставници беше презентирана работата на Детски Едукативен Центар (ДЕЦ), со посебен акцент на значењето на ИТ образованието, развојот на дигиталните вештини и навременото стекнување компетенции кои се сѐ повеќе барани на пазарот на трудот.
Во време кога технологијата го менува начинот на кој учиме, работиме и комуницираме, од особена важност е децата и младите да стекнат повеќе од основна дигитална писменост. Денес тие треба да развиваат логичко размислување, креативност, способност за решавање проблеми, тимска работа и иновативен пристап кон предизвиците. Токму овие вештини се во срцето на програмите кои ги реализира ДЕЦ преку обуки за програмирање, развој на дигитални проекти, вештачка интелигенција, веб технологии и други современи ИТ дисциплини.
Наставниците имаа можност да се запознаат со пристапот на ДЕЦ кон образованието, кој се базира на практична работа, проектно учење и активно вклучување на учениците во процесот на креирање, истражување и решавање реални предизвици. Преку ваквиот пристап младите не само што учат да користат технологии, туку учат и да создаваат со нив.
Особено значајна беше дискусијата за потребата од уште поблиска поврзаност помеѓу формалното образование и развојот на практични вештини кои ќе им помогнат на младите полесно да го пронајдат својот професионален пат во иднина.
Соработката помеѓу Семос Едукација и Junior Achievement Macedonia претставува одличен пример за заедничко делување во интерес на младите во Македонија. Додека ДЕЦ придонесува со долгогодишно искуство во областа на ИТ образованието и развојот на дигитални компетенции, Junior Achievement Macedonia успешно работи на развој на претприемачки вештини, финансиска писменост, иновативност и младинско лидерство.
Веруваме дека иднината им припаѓа на младите кои знаат да комбинираат техничко знаење, креативност и претприемачки дух. Затоа, преку ваквите партнерства и заеднички иницијативи, создаваме можности за нови генерации кои ќе бидат подготвени не само да ги следат промените, туку и активно да ги создаваат.
Детски Едукативен Центар останува посветен на својата мисија да обезбеди квалитетно, современо и достапно образование за децата и младите, а соработките со организации и институции кои ја споделуваат истата визија претставуваат важен чекор кон градење на подобра иднина за целото општество.
Заедно инвестираме во знаење. Заедно создаваме можности. Заедно ја градиме иднината на младите во Македонија.